រាជធានីភ្នំពេញ៖ បន្ទាប់ពីបានទទួលព័ត៌មាន និងការចែកចាយវីដេអូពីគណនីហ្វេសបុកឈ្មោះ Buntha Chheang ដែលបង្ហាញពីសកម្មភាពទូកទេសចរណ៍មួយគ្រឿងបានធ្វើសកម្មភាពបោះសំរាមចូលក្នុងទន្លេរួចមក នៅព្រឹកថ្ងៃពុធ ទី២៩​ ខែឧសភា ឆ្នាំ២០២៤ វេលាម៉ោង ១០ព្រឹក រដ្ឋបាលខណ្ឌដូនពេញ បានអញ្ជើញ ម្ចាស់ទូកកាណូតទេសចរណ៍ដែលមានឈ្មោះ បុប្ផាអង្គរ មកសាកសួរ ហើយម្ចាស់ទូកខាងលើ បានអះអាងទទួលស្គាល់ថាពិតជាបានបោះចោលសំរាមចូលក្នុងទន្លេពិតប្រាកដមែន។

បន្ទាប់ពីបានធ្វើការសាកសួ រួចមក រដ្ឋបាលខណ្ឌដូចចេញបានចាត់វិធានការសម្រេចដោយបានអប់រំណែនាំដល់ម្ចាស់ទូកកាណូតទេសចរណ៍ខាងលើ ឱ្យយល់ច្បាស់ពីច្បាប់ស្តីពីបរិស្ថាន។ បន្ថែមពីលើនេះ​ រដ្ឋបាលខណ្ឌដូនពេញបានសម្រេចផាកពិន័យម្ចាស់ទូកកាណូតទេសចរណ៍ខាងលើ ជាទឹកប្រាក់ចំនួន ២០០,០០០រៀល តាមជំពូកទី៧ នៃអនុក្រឹត្យលេខ ១១៣ អនក្រ.បក របស់ក្រសួងបរិស្ថាន និងបានបញ្ឈប់ការប្រកបអាជីវកម្មទូកកាណូតទេសចរណ៍ឈ្មោះ បុប្ផាអង្គរ ជាស្ថាពរចាប់ពីថ្ងៃនេះតទៅ។

ជាចុងក្រោយ រដ្ឋបាលខណ្ឌដូនពេញ បានថ្លែងអំណរគុណដល់ម្ចាស់គណនី Buntha Chheang ដែលបានបង្ហោះវីដេអូនេះ ក្នុងន័យដើម្បីថែរក្សាដល់បរិស្ថាន៕